- ගාල්ලේ පදිංචි 350ක් නිරෝධායනයේ. උසස් පෙළ සිසුන් 04ක් ඒ අතර
- ආසාදනය වූ 99 දෙනෙක් රෝහල්වලට යවලා
- ඇඟළුම් කම්හලේ සේවක සේවිකාවන් හා ආශ්‍රිතයන් 620ක් ගාල්ලේ
- තවත් 80ක් අද පීසීආර් පරීක්ෂණවලට
ගාල්ලේ පදිංචි හා ගාල්ලේ නිවෙස්වලට පැමිණ සිටි මිනුවන්ගොඩ ඇඟළුම් කර්මාන්තශාලා සිටි කොරෝනා ආසාදිත බවට තහවුරු වූ සේවක සේවිකාවන් පස් දෙනකු හේතුවෙන් 350ට අධික පිරිසක් අද (08) දහවල් වනවිට නිරෝධායනය සඳහා යොමුකර ඇතැයි ගාල්ල දිස්ත්‍රික් වසංගත රෝග විද්‍යාඥ වෙනුර සිංගාරච්චි මහතා පැවසීය.
ඒ අතරින් පුද්ගලයන් 80 දෙනකු සඳහා අද (08) පීසීආර් පරීක්ෂණ සිදුකිරීමට නියමිතව තිබිණි.
ඔහු මේ බව කියා සිටියේ අප කළ විමසීමකට පිළිතුරු දෙමිනි.
වෛද්‍ය සිංගාරච්චි මහතා පවසන්නේ ඇඟළුම් කම්හලේ සේවය කළ ආසාදිත සේවක සේවිකාවන් ඇල්පිටිය, බෝපේ පෝද්දල, හබරාදුව, ඉඳුරුව සහ මාපලගම ප්‍රදේශවල නිවෙස්වලට පැමිණ හෝ පදිංචිව සිට ඇති බවයි. අක්මීමණ පදිංචිකරුවකු ද කොරෝනා ආසාදිතයකු පදිංචි මිනුවන්ගොඩ නිවසක දින කිහිපයක් නතරවී පැමිණ සිටි බැවින් ඔහුගේ ආශ්‍රිතයන් ද නිරෝධායනයට යොමු කර ඇත.
රත්ගම විහාරස්ථානයක හිමිනමක් ද දානමය පිංකමකට සහභාගී වූ අවස්ථාවක එහි ආසාදිතයක් සිටීම හේතුවෙන් විහාරස්ථානයේ ම නිරෝධායනයට යොමුකර තිබිණි. මේ අතර එම විහාරස්ථානයේ වෙනත් හිමිනමකට රෝග ලක්ෂණ මතුවී ඇති බැවින් අද (08) පීසීආර් පරීක්ෂණයකට යොමු කිරීමට නියමිතව තිබිණි.
වෛද්‍යවරයා පවසන්නේ මෙලෙස නිරෝධායනය කර ඇති අය අතරින් වැඩිම පිරිසක් හබරාදුවේ දානමය පිංකමකට සහභාගී වූ අය බවයි. මෙම 350ක පමණ පිරිස ආසාදිතයන්ගේ පළමු පෙළ ආශ්‍රිතයන් බවත් ඉන් එක් අයකු හෝ ආසාදිතයකු වුවහොත් දෙවැනි පෙළ ආශ්‍රිතයන් ද නිරෝධායනය යොමු කිරීමට සිදුවන බව ද හෙතෙම පැවසීය.
නිරෝධායනය වෙමින් සිටින මෙම පිරිස අතර මෙවර අපොස උසස් පෙළ විභාගයට පෙනී සිටීමට නියමිත සිසුහු හතර දෙනෙක් ද සිටිති.
හබරාදුව පොලිස් නිල සෙවණ නිරෝධායන මධ්‍යස්ථානයේ සහ හෝටල් කිහියක මේ වනවිට නිරෝධායනය සඳහා යොමුකර ඇති පිරිස 620ක් බව ගාල්ල දිස්ත්‍රික් සෞඛ්‍ය සේවා අධ්‍යක්ෂ කාර්යාලය පවසයි.
මෙලස නිරෝධායනය වෙමින් සිටිනේ මිනුවන්ගොඩ ඇඟළුම් කර්මාන්තශාලවේ සේවක සේවිකාවන් හා ඔවුන්ගේ සමීප ආශ්‍රිතයන් 620 ක පිරිසක් මේ වනවිට හබරාදුව පොලිස් නිල සෙවණ නිරොධායන මධ්‍යස්ථානයේ සහ හෝටල් කිහිපයක නිරෝධායනයට යොමු කර තිබේ. ඒ අතර මිනුවන්ගොඩ හා ගම්පහ රෝහල්වල සේවය කරන හෙදියන් 07 දෙනෙක් සහ උපස්ථායකයෝ 07 දෙනෙක් ද සිටිති.
මෙම පිරිස අතරින් තවත් 12 දෙනකුගේ පමණ පීසීආර් පරීක්ෂණ අද (08) සිදුකිරීමට ගාල්ල දිස්ත්‍රික් වසංගත රෝග විද්‍යා අංශය පවසයි.
මේ අතර ගාල්ලේ නිරෝධායනය වෙමින් සිටිය දී සහ ගාල්ලට පැමිණ සිටිය දී රෝග ලක්ෂණ පෙන්වීම හේතුවෙන් ඊයේ (07) සිදුකරන ලද පීසීආර් පරීක්ෂණවලින් ආසාදිතයන් බවට හඳුනාගත් 43 දෙනකු ඇතුළු 99 දෙනකු කොරෝනා සඳහා වෙන්කර ඇති රෝහල්වෙත යොමුකර තිබිණි
මෙම 99 දෙනාගෙන් 79 දෙනකු කාන්තාවන් බවත් ඔවුන් අතරින් දිවුලපිටියේ පදිංචිව සිටි කාන්තාවගේ දියණිය සහ තවත් ආශ්‍රිතයකු හැර අන් සියලු දෙනාම ඇඟළුම් කම්හල් සේවක සේවිකාවන් බවත් වෛද්‍ය සිංගාරච්චි මහතා පැවසීය.
හෙතෙම වැඩිදුරටත් මෙසේ ද කීවේය.
”මේ ආසාදිතයන් 06 වැනිදා 16 දෙනෙක්, 07 වැනි දා 40 දෙනකු හා අද (08) 43 දෙනකු වශයෙන්. ඔවුන් සියලු දෙනාම රෝහල් වෙත යොමු කිරීමට කටයුතු කළා. ගාල්ලේ රෝහල් කිහිපයකින්, මාතර දිස්ත්‍රික්කයෙන් හා හම්බන්තොට දිස්ත්‍රික්කයෙන් ගෙන්වාගත් ගිලන්රථ මගින් රෝහල්වෙත යැව්වා. අපි ඔවුන් රෝහල්වෙත යැවීමේ දී කාන්තාවන් මිනුවන්ගොඩ රෝහලට, නෙවිල් ප්‍රනාන්දු රෝහලට හා වැලිකන්ද රෝහලට යොමු කළා. පිරිම අය යොමු කළේ හම්බන්තොට රෝහලට. දරුවන් සහ සංකූලතා තිබෙන අය අයිඩීඑච් රෝහලට යැව්වා. දැනට ගාල්ල දිස්ත්‍රික්කය තුළ කිසිම ආසාදිතයකු ප්‍රතිකාර ලබමින් නැහැ. කරාපිටිය රෝහලේ දී ආසාදිත බව හඳුනාගන්නා අයත් කොරෝනා ප්‍රතිකාර සඳහා වෙන්කර ඇති රෝහල් වෙත යොමු කරනවා. “
නිරෝධානයනය වෙමින් සිටින 06 දෙනකුගේ පීසීආර් පරීක්ෂණ වාර්තා ලැබීමට නියමිතව ඇති අතර තවත් 16 දෙනකු අද (08) දිනයේ පීසීආර් පරීක්ෂණ සඳහා යොමුකිරීමට නියමිතව තිබිණි.
