විවාහක කාන්තාවක් සමඟ ලිංගික සම්බන්ධතා පවත්වමින් ලබාගත් ඡායාරූප ඇගේ සැමියාට සහ ඥාතීන්ට යැවූ බෞද්ධ භික්ෂුවකට මාස 06ක ලිහිල් සිර දඬුවමකට සහ රුපියල් 2500.00ක දඩයක් නියම කිරීමට කොළඹ ප්‍රධාන මහේස්ත්‍රාත් තනූජා ලක්මාලි ඊයේ (12) නියෝග කළාය.
ඊට අමතරව කාන්තාවට රුපියල් ලක්ෂයක වන්දියක් ගෙවන ලෙස ද නියෝග කෙරිණි.
මෙලෙස දඬුවම් නියම වූයේ රාජාංගණය ප්‍රදේශයේ විහාරස්ථානයක බෞද්ධ භික්ෂුවයකට ය.
එම විවාහක කාන්තාවගේ සැමියා විදේශගතව රැකියාවක නිරතව සිටිය දී ඇය සහ බෞද්ධ භික්ෂුව සමීප ඇසුරක් පවත්වා ඇත. මේ ඇසුර සම්බන්ධයෙන් කාන්තාවගේ සැමියා දැනගත් පසු ඇය එම සම්බන්ධය නතර කර තිබේ.
කාන්තාව සම්බන්ධය නතර කිරීම පිළිබඳ උරණ වූ බෞද්ධ භික්ෂුව ඇය ඇසුරු කළ කාලයේ ලබාගත් ලිංගික දර්ශන සහ ඡායාරූප ඇගේ සැමියාට සහ ඥාතීන්ට යවා ඇත.
වින්දිත කාන්තාව විසින් මේ පිළිබඳ අපරාධ පරීක්ෂණ දෙපාර්තමේන්තුවේ පරිගණක අපරාධ ක‍ොට්ඨාසයට දැනුම් දීමෙන් පසු මූලික පරීක්සණ පවත්වා භික්ෂුවට එරෙහිව චෝදනා ගොනුකර තිබිණි.
ඉදිරිපත් වූ කරුණු සලකා බැලූ මහේස්ත්‍රාත්වරිය භික්ෂුවට එලෙස දඬුවම් නියම කළාය.
