රෝගාතුරවීම හේතුවෙන් කරාපිටිය ශික්ෂණ රෝහලට ඇතුළත් කර පීසීආර් පරීක්ෂණයකට යොමුකළ ගාල්ල මහ නගර සභා නිලධාරිනයට කොරෝනා ආසාදනය වී නොමැති බව වෛද්‍යවරු කියති.
අද (14) උදෑසන ඇයගේ පීසීආර් පරීක්ෂණ වාර්තාව ලැබී තිබිණි. එම නිලධාරිනිය අවමංගල්‍ය උත්සවයකට සහභාගී වී තිබීමත්, එම අවමංගල්‍ය උත්සවයට ගම්පහ ප්‍රදේශයේ පිරිසක්ද සහභාගී වී තිබීමත් හේතුවෙන් ඇය දින 14ක කාලයක් ස්වයං නි‍රෝධායනයට යොමු කර තිබේ.
ඊයේ මෙම නිලධාරිනය රෝහල්ගත කර පීසීආර් පරීක්ෂණයකට යොමු කළ බවට පැතිර ගිය ආරංචියත් සමග ගාල්ල මහ නගර සභාවේ කොාරෝනා ආසාදිතයකු වාර්තා වී ඇති බවත් ඒ හේතුවෙන් නගර සභාව වසා දමා ඇති බවටත් සාවද්‍ය පුවත් පැතිර ගියේය.
ගාල්ල මහ නගර සභාවේ නිලධාරී නිලධාරිනියන් අතර කොරෝනා ආසාදිතයන් කිසිවෙකු නොමැති බව නගර සභාවේ සෞඛ්‍ය අංශය තහවුරු කරයි. එබැවින් අනවශ්‍ය බියක් ඇතිකර නොගත යුතු බව ද අත්‍යාවශ්‍ය කාර්යයක් සඳහා ගාල්ල මහ නගර සභාවට පැමිණෙන සියලු දෙනා සෞඛ්‍ය ආරක්ෂිත ක්‍රමවේදයන් අනුගමනය කිරීම අනිවාර්ය බවත් නගර සභාවේ සෞඛ්‍ය දෙපාර්තමේන්තුව පවසයි.
